Gap撈Tech

【破·壹錘】Telegram的失實報導

睇完《【壹錘】高官議員轉用Telegram 比拼私隱度真係高啲?》,初頭未睇內文見到心諗:「正呀,又可以幫手推動Telegram」!點知一見內文,有無搞錯,香港資訊科技商會榮譽會長方保僑居然帶頭亂嗡,令筆者嘩然。

筆者好肯定方保僑已經同 Telegram 脫節,相信佢只係單憑佢對 Telegram 嘅記憶提供資料,提供資料前無做過任何 Research,因為佢對話中提及嘅功能以及其總結,只係講緊一年前嘅 Telegram(雨傘運動嗰排),今天的 Telegram 已經提供極具重要性的功能,文中卻隻字不提,筆者認為無論對讀者或對Telegram都極度不公平,所以要企出黎同大家講清楚 Telegram 點樣完勝 Whatsapp。

謬誤逐點擊破

以下是節錄《【壹錘】高官議員轉用Telegram 比拼私隱度真係高啲?》的謬誤(紅色字體)

篩選式說法:
Telegram可以傳送簡報,也可以傳送PDF,方保僑更說Telegram每次傳送1GB的文件也沒有問題」

全面說法:
Telegram 可以傳送任何檔案,每個檔案上限 1.5GB。經過筆者實測(於其它文章內),傳送速度比 Whatsapp 或 Line 快2-4倍。


謬誤一:
「可以以一個電話號碼,同時在不同手機、電腦使用,亦可以看回所有對話的內容,聽起來好像不錯,但缺點是當你不幸遺失其中一部電話,別人拾到也可以看到你正在打訊息

正確說法:
Telegram 可以在任何裝置(電腦、手機、平板、Apple Watch)使用,更加比WhatsApp多四重保安功能。

第一重保障 - 用家可以在每個不同的裝置上設定不同的Telegram 密碼 :
當你不幸遺失其中一部裝置,這個密碼可以保障你裝置內Telegram的訊息。

第二重保障 - 用家可以管理所有裝置的狀態:
當你不幸遺失其中一部裝置,可以即時強制Logout該裝置。(大前提你需要確保你要先有第一重保障)

第三重保障 - 雙重驗証
這個與LINE的相同,舉個例,就算有朋友趁你走開咗,你部Tablet個Telegram仲著緊又未自動Lock嘅時候,你朋友想偷地地係佢部Tablet Login入你Telegram,朋友只會過到第一步的 Telegram code 六位數字驗証,而過唔到第二步你手動預設咗嘅密碼驗証。

第四重保障 - 取得非授權的登入資料
係LINE雙重驗証未推出之前,相信唔少人都試過被人爆LINE,原因就係因為貪方便開左電腦版嘅LINE 同時個密碼太簡單,就會變得好容易爆,最慘就係連比邊個爆入去都唔知,想報警都無資料報。

如果你用Telegram 真係咁不幸有以下例子

  • 你個Telegram 中門大開比到朋友入到去睇,朋友可以拎到第一重驗証碼

  • 同時有朋友知道背後雙重驗証嘅密碼,諗住靜靜雞入你Telegram

好可惜呢個舉動並唔係無聲無息。因為Telegram 會自動 Send 新登入裝置嘅資料(包括 IP Address、地點、裝置類型)去你已登入嘅裝置入面,偌你真係被人爆Telegram,你一定會知!

未用過Telegram 嘅可以留意一下 ScreenShot

  • 第一、三重保障

  • 第二、四重保障

謬誤二:
「不過方保僑說以上比較,並不適用於群組聊天。」

正確說法:
Secret Chat 不能在群組聊天𥚃用。其它 Send 檔案以及跨平台服務都可以在群組中使用!


WhatsApp未被人Hack過?

因為 WhatsApp、LINE 利用單一性去減低開發成本,因為單一的關係,唔需要同步不同裝置的訊息,好多保安功能都唔需要做,亦都很落後。

相反,Telegram 因為有著極強的跨平台功能,所以Telegram 必須投放資源開發筆者所提及嘅「四重保安功能」,唔似當年 LINE 未有雙重驗証咁樣,只要啟用電腦版Login 就咁容易被人爆Account 然後無那那有個熟悉的頭像叫你江湖救急買點數。

WhatsApp未被Hack過?有無試過因為借部機比人用然後 WhatsApp 比人偷睇過?又或者成日懷疑人地有無偷睇過你WhatsApp?全因 WhatsApp 無提供 Passcode Lock 比你!係時候放棄WhatsApp 減低生活煩惱!

總結

Telegram 係一個完整、安全嘅跨平台 IM ,筆者上一個月亦曾經寫過《Telegram 的優勢》,重點比較過 WhatsApp以及 LINE。

其實單憑Telegram 內置的 Passcode Lock 已經可以定奪 Telegram 的安全度比 WhatsApp 高。另外其餘 3 項保安功能都係因為保障跨平台服務而設。

壹. 站在安全的高地上,Telegram 完勝 WhatsApp、LINE

貳. 站在簡潔的高地上,Telegram 完勝 LINE

叄. 站在方便的高地上,Telegram 完勝 WhatsApp、LINE

肆. 站在速度的高地上,Telegram 完勝 WhatsApp、LINE

伍. 站在企業道德的高地上,Telegram 完勝 WhatsApp、LINE

陸. 站在更新速度及穩定性的高地上,Telegram 完勝 WhatsApp

柒. 但站在香港用戶群的高地上,WhatsApp 完勝 Telegram、LINE

用緊WhatsApp嘅你,第1-6 點都唔可以控制 Whatsapp差過Telegram 嘅事實,只可以默默咁等WhatsApp進步...

  • 等 WhatsApp 更新彈App問題,解決不穩定問題
  • 等 WhatsApp 解決換手機過WhatsApp問題
  • 等 WhatsApp 斬掉重練,改善速度慢的問題
  • 等 WhatsApp iOS 電腦版
  • 等 WhatsApp 開發 Tablet、PC 版本
  • 等 WhatsApp (Facebook) 收集多啲你嘅對話,透過對話分析你啲喜好
  • 等 Facebook 嘅廣告命中率更高
  • 等 Facebook 賺更多啲錢,然後再實行上面嘅「等」

只有第七點你可以控制 - 但站在香港用戶群的高地上,WhatsApp 完勝 Telegram、LINE

就喺好似筆者咁成為主動的一群,推薦朋友睇

推介身邊朋友一齊轉用Telegram,拒絕爛橙!

題外話:用緊電腦睇呢一篇文章嘅朋友,有無試過 Copy 啲連結去 Facebook message 然後再係手機嘅 Facebook Messager 度 Copy 番去 WhatsApp?有嘅話,你會愛上Telegram。



Author image
About Gap
Hong Kong
A Hongkong programmer who loves design & coding and believes open source software business can change the world.